සමගිය සහ සංස්කෘතියේ උත්කර්ෂවත් සැමරුම සමඟ ‘සලාම් රාමසාන් 2026’ කොළඹ දී ආරම්භ වෙයි

ශ්‍රී ලංකාවේ ප්‍රමුඛතම මුස්ලිම් සංස්කෘතික උළෙලක් මෙන්ම, කොළඹ මහා නගර සභාව හා එක්ව බස්නාහිර පළාත් සභාව ක්‍රියාත්මක කරන ප්‍රධාන වැඩසටහනක් වන ‘සලාම් රාමසාන් 2026’, හරිත මාවතේ දී (Green Path) උත්කර්ෂවත් අයුරින් ආරම්භ විය. මෙය ඇදහිල්ල, සංස්කෘතිය සහ සහජීවනය විදහා දක්වන දින තුනක විචිත්‍රවත් සැමරුමක ආරම්භය සනිටුහන් කරයි.

බස්නාහිර පළාත් ගරු ආණ්ඩුකාරතුමා සහ කොළඹ නගරාධිපතිනිය නෙළුම් පොකුණ පිවිසුමට පැමිණීමත් සමඟ සමාරම්භක උත්සවය ආරම්භ වූ අතර, ශ්‍රී ලංකාවේ විවිධ මුස්ලිම් ප්‍රජාවන් නියෝජනය කරන දරුවන් විසින් ඔවුන්ව පිළිගනු ලැබීය.

සමගියේ සංකේතයක් ලෙස මැලේ, මුවර්, මේමන් සහ දාවුදි බෝරා ප්‍රජාවන්ට අයත් දරුවන් සම්භාවනීය අමුත්තන් සමඟ ප්‍රධාන වේදිකාව දක්වා පෙරහැරකින් ගමන් කළහ. උද්යෝගිමත් “කාලි කොළඹ” (Kali Kolombo) නර්තන කණ්ඩායම විසින් මෙම පෙරහැර මෙහෙයවන ලදී.

මෙම අවස්ථාවට සියලු දෙනා ඇතුළත් කරගන්නා ස්වභාවය විදහා දක්වමින්, සාම්ප්‍රදායික පොල්තෙල් පහන දැල්වීම සහ ජාතික ගීය ගායනා කිරීම සිදු විය.

මෙහිදී පිළිගැනීමේ කතාව සිදුකළ සභාපතිතුමා අවධාරණය කළේ ‘සලාම් රාමසාන්’ යනු එක් ප්‍රජාවකට පමණක් සීමා වූ සැමරුමක් නොව, ආගමික හෝ පසුබිම් භේදයකින් තොරව සියලුම ශ්‍රී ලාංකිකයන්ට රාමසාන් මාසයේ පවත්නා පරිත්‍යාගශීලීභාවය, දයාව සහ සමගිය වැනි පොදු වටිනාකම් අත්විඳීමට කරන විවෘත ආරාධනයක් බවයි.

කොළඹ නගරාධිපතිනිය විසින් කොළඹ නගරයේ සංස්කෘතික සහජීවනය සඳහා ඇති කැපවීම නැවත තහවුරු කළ අතර, ප්‍රජාවන් අතර සුහදතාවය ශක්තිමත් කරන මෙවැනි ගෞරවනීය වේදිකාවක් නිර්මාණය කිරීම පිළිබඳව ගරු ආණ්ඩුකාරතුමා සංවිධායක මණ්ඩලයට ප්‍රශංසා කළේය.

ගරු ආණ්ඩුකාරතුමා ඇතුළු සම්භාවනීය අමුත්තන් විසින් ‘සලාම් රාමසාන්’ උත්සව ආලෝකය නිල වශයෙන් විවෘත කිරීම රාත්‍රියේ විශේෂම අවස්ථාව වූ අතර, එයින් හරිත මාවත ඉතාමත් අලංකාරවත් ලෙස ආලෝකවත් විය.

2026 පෙබරවාරි 27 සිට මාර්තු 1 දක්වා, සවස 5.00 සිට මධ්‍යම රාත්‍රිය දක්වා, හරිත මාවතේ (ආනන්ද කුමාරස්වාමි මාවත) ආහාර සහ වෙළඳ කුටි 120කට අධික ප්‍රමාණයක්, සංස්කෘතික සංදර්ශන, උරුමයන් ප්‍රදර්ශනය කරන ප්‍රදර්ශන කුටි, අරාබි අක්ෂර කලාව (Calligraphy), හැනා කලාව සහ පවුලේ සැමට භුක්ති විඳිය හැකි විවිධ අත්දැකීම් රාශියක් ඇතුළත් වේ.

දරුවන් සඳහාම වෙන්වූ විශේෂ ආරක්ෂිත ළමා කලාපයක් (Kids’ Zone) නිර්මාණය කර ඇති අතර, උත්සවය අතරතුර පැමිණෙන අමුත්තන්ට තම ආගමික වතාවත් පහසුවෙන් ඉටු කිරීම සඳහා යාඥා පහසුකම් ද සලසා ඇත.

පවුල් පිටින් පැමිණෙන පිරිස්, තරුණ තරුණියන් සහ දිවයින පුරා සිටින අමුත්තන් හට මෙයට සහභාගී වන ලෙස අපි ඉතා කාරුණිකව ආරාධනා කරමු. ශ්‍රී ලාංකේය මුස්ලිම් ප්‍රජාවගේ ආහාර සංස්කෘතිය, කලාත්මක ප්‍රකාශනයන් සහ සංස්කෘතික උරුමයන් ආරක්ෂිත සහ උත්සවශ්‍රීයෙන් යුත් පරිසරයක අත්විඳීමට ‘සලාම් රාමසාන්’ සුවිශේෂී අවස්ථාවක් ලබා දෙයි.

මුළු රටටම අයිති මෙම සැමරුමේ කොටස්කරුවන් වන ලෙස ‘සලාම් රාමසාන් 2026’ සංවිධායක කමිටුව සියලුම ශ්‍රී ලාංකිකයන්ට ඇරයුම් කර සිටියි.